બે મત્લા....

ડ્રીમ બીગ'ને સાદી રીતે સમજાવું?, શેખચલ્લી.

મટકી ફૂટે ને મહેલો તૂટે ક્યાં જાવું?, શેખચલ્લી.

******************************************

જગ્યા નથી તો એનો બસ આભાસ ઊભો કર.

ટોળા તરત થશે,  વિરોધાભાસ ઊભો કર.


**************************************

એટલે ચગળ્યા કરે છે મૌનને.....

એટલે ચગળ્યા કરે છે મૌનને,

ચોકલેટી શબ્દ સરખા ના બને.

કોઈ બીજું જીંદગીમાં છે જ નહીં,

વારે વારે કેમ કહે છે એ તને?

સહુ પદારથ પ્રેમનો પામી ગયા?

બસ રટીને રોજ એના નામને.

બે વખત ભેગા મળી છુટ્ટા પડે,

માને કાંટાનો સમય,સમજાવને.

જો ઝરણ જોઈ તને મરક્યું જરી,

સહેજ તો પગની ગતિ થંભાવને.

મુક્તક

પતંગોને ચગાવે છે,

પવન બહુ ધાડ મારે છે.

કપાયો પેચમાં જ્યારે,

તો દોરી કેમ પાડે છે?

કાન પાછળ આપના પ્રસ્વેદ છે?

કાન પાછળ આપના પ્રસ્વેદ છે?

હાથમાં જે ગ્રંથ છે એ વેદ છે?

જીંદગી ટૂંકી પડે એવું થશે,

ફૂટપટ્ટીથી ય લાંબા ખેદ છે.

સાતમે આકાશ જઈને જોયું તો,

આ જગત તો સાવ નાની કેદ છે.

અંતવાદી અંતમાં એ માનશે?

અંતમાં કે મધ્યમાં ક્યાં ભેદ છે.

બસ નફો સમજાય મૂડીવાદને,

ને છગનને ટંકની ઉમ્મેદ છે.

टौस कर के भाग्य को ही देख ना!

काम करना बंध था उस हाथका,
स्पर्श को संभालना अब काम था.

वो हमारे साथ हो एसा लगा,
सांस लेना इस हवा का बंध सा.

शाम को लाचार सुनना बात का,
नींद का लोरी से छूपकर भागना.
...
युं कुचलकर फूल को अच्छा किया,
ढूंढ़ते थे कांटे कोई रासता.

पूछ मत हर बात पे अब क्या करुं,
टौस कर के भाग्य को ही देख ना!

(16-26.12.13)

કશું....

એને કરું જો બાદ તો બચતું નથી કશું,

એને ઉમેરવાથી પણ વધતું નથી કશું.

જ્વાળામુખી તો શાંત છે, મનની સપાટી પણ,

ભીતર કરી તપાસ તો ઠરતું નથી કશું.

તૂટી જવાની ટેવ જો પેધી પડી ગઈ,

વળવાનું શક્ય હોય તો વળતું નથી કશું.

ધક્કેલતા સમયને હું ઉથલાવવા મથું,

પડતી રહે સવાર બસ પડતું નથી કશું

ટહુકો કશેક થાય તો ટેબલને થાય કે,

લીલો છે થોડો ભાગ ને ઉગતું નથી કશું.

(22-25 Oct'15)

ઘણીએ odd લાગે છે...

ઘણીએ odd લાગે છે, 

જીવનની દોડ લાગે છે. 

અમે તૂટીને જોડાયા, 

તને તડજોડ લાગે છે? 

હજી માણસ નથી તેથી, 

બધાને God લાગે છે? 

'વગેરે'માં 'વગેરે' છે, 

છતાં બેજોડ લાગે છે. 

નદી આકાશ સામે થઈ, 

હવે એ Road લાગે છે. 

નથી error છતાં de-bug? 

જીવનનો Code લાગે છે. 

 (October 20, 2015)

કાંટા વગરના થોરનો ઇતિહાસ તો જુઓ...

કાંટા વગરના થોરનો ઇતિહાસ તો જુઓ,

લોહી સુકાયું છે એ જગા ખાસ તો જુઓ.

કાંટા વગરના થોરનો ઇતિહાસ તો જુઓ,

સાદો સરળ સચોટ છે, ઉપહાસ તો જુઓ

ચશ્માં ને આંખ ચેન્જ કરી પણ ફરક નથી?

ઓછો નથીને રૂમમાં અજવાસ તો જુઓ?

હેંગર ઉપર કરે છે જીવન બસ પસાર એ,

મેરેજ સૂટનો કોઈ વનવાસ તો જુઓ.

એને વખત નથી તો એ મળતા નથી ખરું,

મારા સમયનો દીર્ધ આ ઉપવાસ તો જુઓ.

(6 April, 2015) 

બધા વૃક્ષને એ સવાલો થયા છે...

બધા વૃક્ષને એ સવાલો થયા છે,

અમારી હજી કોઈ શાખા જ ક્યાં છે?

જગતને પડેલા નવા ઘાવ જોઈ,

ને દર્દો અમારા સુંવાળા થયા છે.

એ ઈશ્વરની સામે જ નમતા નથી પણ,

ઘણાની તરફ તો ય વળતાં રહ્યા છે.

અમારી તરફ છો એ દેખાવ ખાતર?

અમારી તરફ પણ અમે ક્યાં ઢળ્યાં છે.

બહાના કરી ના મળો દર વખત પણ,

ઘણા ખૂબસૂરત બહાના મળ્યા છે.

(18 June 2015) 

Discussion મૌન સાથે થયું...

Discussion મૌન સાથે થયું,

ભીડમાં મારી demand બહુ.

એક sun, એક shadow થશે,

હો હજારો જો sun, shadow છૂ.

સંભળાતી નથી,જે સમજ,

દેખતા હોય છે એને સહુ.

અવતરે આભથી જો કશું,

તો જ થોડું થશે એનું ભલું?

Selfie તો ઝડપથી લીધી, 

એમ 'image'નું પણ થયું?

(22 August, 2015) 

ફૂલ પાસે જે કળી છે...

ફૂલ પાસે જે કળી છે,
શું થયું, તે ખળભળી છે?

પહેર ઈચ્છાઓની વીંટી,
ખૂબ લીસી આંગળી છે.

ભાર સમજણનો વધ્યો તો,
વૃદ્ધની કેડો વળી છે.

ભાર સમજણનો વધ્યો તો,
કેડથી વાંકી વળી છે.

વાત ના સમજી શક્યો,
વેદના મેં સાંભળી છે.

ધર્મ કોઈ લાલ પીળો,
ધર્મ કોઈ વાદળી છે.

(12 સપ્ટેમ્બર, 2015) 

દટાયું છે....

બરફ જેવું છવાયું છે,

છતાં લીલા થવાયું છે.

બધું પત્થર થયું છે,

પછી શું ખળખળાયું છે?

હજી લોથલમાં ખોદો તો,

મળે જે સત દટાયું છે.

હતું પંખીપણું અંદર,

તો થોડું કલબલાયું છે.

અમે સીધા ગયા તેથી,

તમારાથી વળાયું છે.

March 11, 2015

વેલેનટાઇન જેવું લાગશે......

તું વજન ઉચકે નહીં તો શું થશે?
ભાર પોતાનો જ એને પાડશે.

તું નજર ઠપકા ભરેલી નાખ ના,
જો સમય ધબકાર જેવું ચૂકશે.

તું હથેળીમાં રહે પારા સમી,
સહેજ વેલેનટાઇન જેવું લાગશે.

સાવ કોરો રાખશું એને અમે,
તો ય એ ચહેરાને સાચો વાંચશે.

ભીંતમાં દરવાજા જેવું કંઈ નથી,
જે નવી આવી હવા, પાછી જશે.

February 26, 2015

કઈ કઈ સજામાં છે...

નદી, દરિયો, તપેલી, ડોલ, બોટલ જે કશામાં છે,

કહો જળ કે કહો પાણી, એ બે રીતે મજામાં છે.

બધું છોડ્યાનો એ સંતોષ ત્યારે થરથરી ઉઠશે,

ખબર જ્યારે મળે કે ત્યાગ તારો દુર્દશામાં છે.

ઘણી ઝડપે વધી ઉંમર ભલે નાની તમારી વય,

કશું સમજાય નહી લાગે સમજ મારા ગજામાં છે.

ચબરખી પ્રેમની કોરી મળે તો ફાડશો નહી,

સમજવું એય આમાં કેટલી ઊંચી દશામાં છે.

નગર જ્યારે મળે સામે મને પૂછ્યા કરે છે,

નવું ઘર, કાર, સારી જોબ - તું કઈ કઈ સજામાં છે.

December 25, 2015

ભડકો થશે...

પાંપણો મીંચ્યા પછી નહી ઊઘડે,

ભેજ જેવું કંઈક એમાં રાખજે.

મૌનને ધારણ કરી લેજે પછી

શબ્દના વસ્ત્રો કદી ટૂકા પડે.

ના અઢેલી બેસ એને આ રીતે,

ભીંત ધારોકે હવાની નીકળે.

ટોચ પરની રીત છે ઊભા રહો,

ઊતર્યા આરામ કરવા લો અમે.

સહેજ પણ અભ્યાસ, તૈયારી વગર,

તું વિષય અડકીશ તો ભડકો થશે.

October 1, 2015

તો દિવસ ઉગશે નવો....

સૂર્યને ઝાકળ જો નવડાવી અને ચોક્ખો કરે, તો દિવસ ઉગશે નવો.

બારણે તાળા હશે એ બોમ્બ થઈને ફૂટશે, તો દિવસ ઉગશે નવો.

રાતને છેવાડે પહોંચેલી હતી એ વાત કહે ધારકે હું ના પૂરી થઈ,

ચંદ્ર અટકી સૂર્યને આવી જતા જો રોકશે, તો દિવસ ઉગશે નવો?

એ નથી જીતી શક્યો એની જ નીચે છે જે અંધારુ - દીવાની કથા,

એ કથાનો અંત જો બીજી જ રીતે આવશે, તો દિવસ ઉગશે નવો.

મીણબત્તી સૂર્યનો પર્યાય બનવા 'ના' કહે, આગિયા ને દીવા પણ,

માન એનું રાખવા પણ જો બરફ હામી ભરે, તો દિવસ ઉગશે નવો.

બધે સરખી ઉદાસી છે?

બધે સરખી ઉદાસી છે?

પણેથી સહેજ ત્રાંસી છે.

અમે હમણા તપાસી છે

ક્ષણોને તો કપાસી છે.

તમે બેઠા સિંહાસન પર?

અને ઈચ્છાઓ દાસી છે?

પછી સાંજે બતાવે છે

છુપાવે જે અગાસી છે.

તમે મરીયમને કીધેલું?

અલી ડોસાને ખાંસી છે.

હજી તો gapમાં છે...

બીજા બધામાં છે, ક્યાં shapeમાં છે,
આ generation હજી તો gapમાં છે.

આજે જરા ઉથાપન late રાખો,
ઠાકોરજી હજી પણ napમાં છે.

બદલે છે moodને touch-screenથી જે,
ખૂબી એવી કહો કઈ appમાં છે?

પોકળ ધરાના દાવા સ્વર્ગ બાબત,
શોધો એ ક્યાંય google mapમાં છે?

કર તપાસ...

 જે ખોવાયું છે એ મળશે પહેલા ઘર તપાસ,
કરે છે ઘર છૂપાયેલા એ પહેલા ડર તપાસ.

નથી સપડાયુ કોઈ કેમ સમજાશે કદાચ,
નથી પાણીમાં સોનાની જરા એ કર તપાસ.

પતંગો પર લખી એને ચગાવી જો કદીક,
વિચારો ગોથ મારે કે ચડે અધ્ધર તપાસ.
...
હતા એ યુધ્ધમાં સામે ઘણી વેળા છતાંય,
બધાને કેમ ના લાગે કોઈ ટક્કર તપાસ.

એ ઝાંપો, દાદરો ને હીંચકો ને ભૂતકાળ,
મળે, જો દૃશ્યને ફાડી કરે અંદર તપાસ.

(૦૩-૨૬.૦૧.૧૪)

बच्चे को लेकर गये छत पे कभी?

बात ना करना दरारों से कभी,
कान होते है, दिवारो के कभी.

जो कभी अखबार मे आया नही,
वाकया सब की जुबानो पे कभी.

मान लो पतझड को जाते रोक लुं,
पेडने डाली को धमकाया है कभी?...

रात बिस्तर को चुराके सो गई,
ख्वाब जब उखडे रहे हमसे कभी.

चांद भी आयेगा करने गुफतगू,
बच्चे को लेकर गये छत पे कभी?

 

(25.09-14.10.13)

આંખો જ સાલી છે સજળ...

છોને ઘણું છે બાહુબળ,
આંખો જ સાલી છે સજળ.

અપલોડ વાદળને કરી,
વરસાવે છે આ કોણ જળ.

તકલીફ - સમજત અર્થ તો,
એથી બધું લખતા સરળ.
...
બદલાય છે જો કે સમય,
હાઉ અબાઉટ, એક પળ.

અફસોસ તો અકબંધ છે,
છોને ઘણા ઉકલ્યા પડળ.

(17-29.11.13)

કલ્પન જરી વધારો.........

આવું તો ના પધારો,
પલળી ગયા વિચારો.

સપના ઘણા છે તેથી,
જાગી જ નહી સવારો.

વાંધો ઉઠાવો નાનો,
મોટો થશે સુધારો.
...
પીંછા નથી જ ઉડ્ડયન,
કલ્પન જરી વધારો.

બસની ટિકિટ પાછળ,
કરશો કયા કરારો.
(05-11.12.13)

દરમાયો.......

સૂર્યનો જોવો હતો પડછાયો,

એટલે મલહાર લો મેં ગાયો.

દંડવત હોવા છતાં પણ બોલો,

મૂર્તિ સામે કેમ હું પછડાયો.

જે તરસનો રોડ છોડી દીધો,

એ પછીથી ખૂબ વખણાયો.

હાજરી આપે છે કાયમ એ, હોં!

યાદનો બાંધોને કોઈ દરમાયો.

ફોટા ઈચ્છાઓના પાડી લેજો,

ક્યારે કેવો મૂડ એનો બદલાયો.
(12-29.11.2013)

વિચારો બડબડે છે......

અહીં ઓછી પડે છે,

તને ક્યાંથી જડે છે?

દબાવી વાત રાખો,

વિચારો બડબડે છે.

વિરહની રાત છોડો,

સવારો પણ સડે છે.

કદી આ શાંત જળ પણ,

અડું તો તરફડે છે.

નવા નામે મળે તો,

ઉદાસી પરવડે છે.

(26.08-10.09, 2013)

શું કરે હેં! બધા કશ એ સિગરેટના!

બધા નીકળે છે લગાવી ગળે દૂરતા,
થશે ક્યારે ઓછી કપાળે એકાદી રેખા?

તમે જોઈને એ જરા પણ ન'તા ખળભળ્યા,

એથી વૃદ્ધના હાથ થોડું હશે ધ્રુજતા?

 

દિવાલો ચણો આંગળા વચ્ચે ધારો તમે,

પછી શું કરે હેં! બધા કશ એ સિગરેટના!

 

કરત તો ય પણ ધર્મ કે દેશથી ભાગ એ?

તફાવત મળત એને લોહીના જો રંગમાં?

 

ટળી જાય આફત, ફળી જાય આફત કદી,

છે અપવાદ રોજીંદી ઘટમાળ માફક ઘટ્યા.


(27.04 -09.05.2013)

નિર્જળ તરતા રહે..

મણકા માળાને આગળ પાછળ કરતા રહે,
જળ પર જાણે કે કોઈ નિર્જળ તરતા રહે.

આખે આખી અવઢવને ઓગાળી નાખી,
પગલે પગલાથી તો પણ પગરવ ડરતા રહે.

હોડી પહોંચી સાગર વચ્ચે સૂક્કી બોલો
ને કાંઠા કેવા હાંફળ ફાંફળ ફરતા રહે.

પાના ને વર્ષો ઊભા છે બસ ત્યાં ને ત્યાં,
હરણા વેગે રણઝણ થઈ સ્મરણો સરતા રહે.

ધારોકે પારેવા થઈ કાગળ વીંઝે પાંખ,
ફૂલો જેવું ઝરમર શબ્દો પણ ઝરતા રહે.

(૦૨-૧૮.૦૨.૨૦૧૩)

ગૂગલ કરો….

શ્વાસ ઉંડા ના ભરો, ગૂગલ કરો.

બહુ મથામણ ના કરો, ગૂગલ કરો.

 

એમણે સરનામુ બદલ્યું છીપનું,

આમ ઊંડે ના તરો, ગૂગલ કરો.

 

એ નદી સૌની ઉપરવટ જાય છે,

એમ કહે છે સાગરો?, ગૂગલ કરો.

 

સાંભળ્યું છે એ ડિજિટલ થઈ ગયા,

ધ્યાન એનું ના ધરો, ગૂગલ કરો.

 

(૨૦.૦૧.૨૦૧૩)